Serekali Kei Yacata

Yacata noqu koro au dau cibitaka

Rogo tu e Viti raraba

Ni cabo bula ena buca ni vala

Sukanaivalu VC na kena toa ni vala

Solia nona bula ena vukui Viti kei Peritania raraba

Tuvatuva ni yanuyanu me'u wasea mada

Ni yawa mai e vaka nai bulibuli ni sala

Ulunivanua o Delaikorolevu e cere ni dokana

Ucuna e rua Daku kei Tabaniya rau dreta na yasana

Kena tukutuku makawa e vakatubu vakasama

Se ni Valu ni Toga mai Wairiki era takasa e matasawa

Moku ra colati ena nodra takia ki Kakabale na koro makawa

Yalayala nei Tui Yacata vei Ra Turaga (Tui Cakau)

Mataivalu nei Wainiqolo ke o bula mai daru qai mai vala

Rarama ni lotu, Totokana sa mai tawani
Veivakatorocaketaki ko Yacata me vakacokotaki

Duavata, cola qele, kacivi na vanua ena qaravi tavi

Ulutaga e va me yavutu ni veiqaravi

Bula raraba, tubu vakailavo, sokalou, kei na vanua, me vakabibitaki

Nai tabagone meda mositi ira sara

Mera tiko ena uto kece sara ni sasaga

Ira qori na tina kei na tama kei Yacata ni mataka

Maumau na buno ke ra la'ki tawa yaga.

Noqu serekali me sa tini mada

Yacata au mai seretaki iko e veiyasana

Sai iko ga na vu ni noqu veika kece sara

Cava ki bulu daru na qai veitalatala.

by Sai Lealea